Öppis erwarte
No nüt
I ha no nüt gno ussert Kafi,
bi ufgstange dä Morgen und ha
no gar nüt gno, no gar nüt gmacht
ussert schnuufen und rouche,
was jo fasch ds Gliichen isch,
nume mit chli meh
oder weniger Aroma.
Aber süsch no nüt, no gar nüt,
ha no nüt gmacht und
no gar nüt gno dä Morge,
nüt ussert Kafi und no nüt gschribe
ussert do di paar Zile,
Zile vo Wort, wo chli töne,
wöu Wort immer töne,
immer e Klang hei,
sogar no denn,
wenn si numen uf Papiir
stö und schwige.
I ha hütt no nüt gseit,
bi ufgstange dä Morgen und ha
no gar nüt gseit,
no gar nüt ddänkt,
nüt, ussert dass i Luscht hätt,
Luscht zum öpper gseh,
mou wieder öpper ghören und
Luscht, mou einisch
e Tag lang nüt z dänke,
nume z rouchen und z schnuufe,
was ungefähr ds Gliichen isch
und eim ds Gfüeu git,
me sig no am Läbe,
me sig no gäng
unger de Läbige.
I ha no nüt behouptet,
bi numen ufgstange
hütt am Morgen und ha
der Tag aagluegt,
dä gwöhnlech Tag und gwartet
und glost, ob i öppis ghöre,
obs ächt nöimen öppis z ghöre git
oder wenigschtens öppis z gseh,
aber i ha nüt ghört und nüt gseh,
nüt, wo ni nid scho gkennt hätt,
ussert der Himu
vor mim Fänschter usse.
Ha dä Himu gseh, dä Himu,
wo au Tag chli angers usgseht
und chli töifer abehanget
und mer ds Gfüeu wott gä,
i chöng nen aalängen und
abezieh oder ufestosse,
wi nen aute Roulade,
wo chli chlemmt.
I ha no niemerem nüt versproche,
niemerem nüt hütt am Morge,
bi erscht afe dranne gsi,
e Vorsatz z fassen oder wenigschtens
mir säuber mou iizrede,
i nähm mer de öppis vor,
irgendeinisch, irgendöppis,
öppis Richtigs,
öppis, wo sinnvou isch,
und derbi
chönnt i jo wüsse,
dass der Vorsatz,
sech öppis vorznäh,
niene härefüehrt und drum
hani nöie Kafi gmacht
und witergroucht
und uf dä Momänt gwartet,
wo aues vo säuber passiert,
aber vüu isch nid passiert.
Gar nüt isch passiert,
ussert dass plötzlech
ds Telefon het glütte,
lut und chaut
und immer wieder.
I has lo dürelütten und ddänkt,
i nähms hütt nid ab,
es chöng nüt Wichtigs si,
wöu a som ne Tag überhoupt
nüt wichtiger cha si
aus nochedänken und
schnuufen und rouche
und em Luft zuelose,
wo immer chli blooset,
so wi so vüu immer do isch,
ohni dass me dra dänkt,
ohni dass mes merkt,
ohni dass mes gspürt, und ig,
i ha ddänkt, i wöu mou wieder
öppis mache, öppis dänke,
öppis gspüre, öppis gseh,
öppis ghöre, öppis erwarte,
aber zletscht isch aues nüt gsi,
nüt aus Kafi, nüt aus Tabak,
nüt aus nume no einisch
e nöie Tag iren aute Wäut
unger däm Himu,
wo ni zwüschinne
chli cha ufestosse
oder chli cha abezieh
oder är mi.
Chrippespüu
Es wiehnachtet,
wiehnachtet,
wiehnachtet sehr.
D Maria, der Josef
und ds Heilige Ching,
di ghöre vom Himu
e göttleche Swing.
Si früren und früre
und warten im Stau,
und ds Strouh i der Chrippe
isch füecht und isch grau.
Der Ochs und der Esu
stö schlottrig im Sumpf,
si hei chuum meh z frässe
und luege chli dumpf.
Es wiehnachtet!
Es wiehnachtet,
wiehnachtet,
wiehnachtet sehr.
Und d Hirte, di stuune
und d Nacht glänzt wi nöi.
Und d Chönige gö
vor em Bébé uf d Chnöi.
Und d Ängle si bsoffe
vor Fröid und vor Glück,
si näh fasch nur doppleti,
drüfachi Schlück.
Di himmlische Schare
flügen ungwönlech töif,
si ganz hert am Sound,
spile göttlechi Löif.
Si singe vom Himu
und maches bekannt,
der Heiland isch cho
über ds trochene Land.
Es wiehnachtet!
Es wiehnachtet,
wiehnachtet,
wiehnachtet sehr.
Und ds Ching i der Chrippe
isch buschper und lut,
und Chaschper und Melchior
verbrönnen es Chrutt.
Vor Füürstöu schmöckts ölig
nach Chrütter und Raps,
und d Hirte, di bringe
chli Suppen und Schnaps.
Der Josef seit danke
und luegt zu sir Frou,
und ds Ching muess chli gränne,
der Seppu muess ou.
Es wiehnachtet,
wiehnachtet,
wiehnachtet sehr.
Der Josef seit danke
und luegt zu sir Frou,
und ds Ching muess chli gränne,
der Seppu muess ou.
D Johreszit
Jo, jo, jo, jetz chöme si,
jo, jo, jo, jetz, jo, jo,
jetz chöme d Johreszite,
di warme, meinen i,
jo, jetz, jetz,
si si de do,
si si de cho,
si si de do gsi,
di Houderblüete,
di Houderbeeri,
di Höigümper,
di Höibeeri,
di Höiwänder
und di Zugvögeli,
wo nid betroffe si
vo aufäuige Beschränkige
bim Zuewanderigskontingänt.
Gli isch der Summer do,
und bi de Rösseler
gits de ds Pfingscht-Springe
und d Schmätterlinge
und d Ängerlinge
und d Sprösslinge
und d Röhrlinge
und d Setzlinge
und d Schnäggechörner
i de Gartebeet,
au zäme si si do,
au zäme si si cho.
He jo, es isch eso,
mir wüss es jo,
mir kenn es scho,
gli si si ändlech do,
gli si si ändlech cho,
di Johreszite,
Spätfrüelig, Früesummer,
die Johreszite,
wo chli warm gä,
wott i säge.
Die, wo chli wärme
i dere coole Zit,
wo mängisch fasch aues
cool und sexy sött si,
di Johreszite,
wo chli fein schmöcke,
wo mängisch fasch schmöcke
wi nes feins Hoor-Shampoo.
Di Johreszite,
wo chli besser belüchtet si,
wo mer so fescht
hei druf planget gha,
si ändlech, ändlech cho.
Si ändlech, ändlech cho,
si ändlech, ändlech do.
Gli isch aus nöi,
drü Hemmli für zwöi,
si höien im Gäu
und im Söiliamt
schmöckts nach Söiblueme
und chli nach Söibschütti
uf de Matte -
und mir,
mir sueche Schatte,
wenn der Früelig
und der Früesummer
ändlech längi Tage mache,
ändlech längi Öbe mache,
und mir öle nis der Rache,
wenn d Gartewirtschafte
ds Mobiliar usestöue
und d Sunneschirme
mit em Reklamenufdruck
für dänisches Bier
oder Cola Zero.
Es chunnt di Zit,
gli chunnt di Johreszit,
wo d Glacecharte
am Kiosk hanget,
wo mängi, mängi, mängi Magnum
gfroore, fescht, fett, fein,
zur Chüeu-Trueh us zoge wird,
wöu me Gluscht überchunnt
uf öppis, wo chüelet,
uf öppis, wo chüeu git,
und d Chüe si ou wieder duss,
und ds Bad am Fluss
isch gli wieder bevöukeret.
Me schmöckt scho ds Sunnenöu
und ds Pommes-frites-Öu
us em Badi-Restaurant,
wo der Ventilator liisli ruuschet
und der Öu-Gruch gliichmässig verteilt.
No isch es nid so lang här,
wo am Waudrand
und am Wägrand
und am Fäudrand
und am Täuerrand
überau der Bärlouch,
ou i de Wirtshüser
überau der Bärlouch, überau
Bärlouchpesto,
Bärlouchravioli,
Bärlouchrisotto,
Bärlouchsalat,
Bärlouchsuppe,
Bärlouchgratin,
Bärlouchschnitte,
Bärlouchsushi,
und z Bärn der Bärevatter,
dört dä Bärevatter
im Tierpark Däuhöuzli
sig e Chindsmörder.
Aber das isch jetz aus,
isch aus scho lang verbii.
Wöu d Johreszite...
