Auso, dr Koni Dick udr Toni Dünn us Chäsiz si widr einisch amene graue, längwilige Sundinamittag im Januar i irer Schtube mit Blick ufd Dorfschtrass bim Konzipiere u bim Repliziere:

• Sichr sis widr nume Legr.
• Wi meinsch?
• Legr! Eifach nume Legr!
• I weis nid, wasde drmit meinsch, Toni.
• Du weisch doch genau, wasi meine! Iz due doch nideso blöd!
• I due nid blöd.
• Mou, du duesch blöd.
• I weis nid, wasde iz widr ufz Mau hesch. Vori isches doch no so schön xi? Aues ischno so richtig guet glüffe mit üs? Mir heis doch no so gäbig gha zäme bim Zmittag mit Härd-öpfuschtock mit Brate u Ärbsli u Rüebli?
• Was isch drann schön xi? Nüt isch schön xi.
• Du schtürmsch widr, Koni.
• I schtürme nid, du schürmsch, wemers gnau wei wüsse.
• I ha xeit, es sige nume Legr xi. Meh nid.
• Was meinsch drmit?
• Di Schtürmicheibe vodr Gmein weinis doch gäng nume inelege! Ikomensschtür u Vrmö-gensschtür, Grundschtückschür u Dachzieguschtür, Gartehagschtür u Füdleabputzschtür, Töffschtür, Vrwautixschtür, Chrangkekasseschtür, Giguschtür, Iischribixschtür, Ufschribixschtür u Abschribixschtür, drzue ono Tschnurisiecheschtür u Tarschläckixschtür, Pfrlängerixschtür u Fahrzügschtür – uni weis nid was no aues!
• Tübrläbixschtür.
• Ut Abschtärbixschtür.
• Tabchratzixschtür.
• Tsurschtoffschtür.
• Dasch haut eso, Toni. Dasch überau eso. Dasch gäng so xi. Was wosch? Schtüre muesme zahle, o wes eim e chli viu düecht. Abr das geit aune so.
• Si weinis doch eifach nume inelege, Koni! Dasch doch aues. U drmit isch o grad aues xeit.
• Weli Schtürmicheibe?
• He, dängk di Schtürmicheibe zChüniz äne! Die vodr Gmein!
• Werum?
• Werum, werum! Du machschmi no fertig mit dim blöde Werum, Mano! Xesch hie das Formular? Es Schtürerklärixformular! Hesch das no nie xeh? Weisch nid, was das bedüttet?
• Ja, und? Es Formular isches Formular, meh nid. Es Stück Papir. Numenes gschissnix Schtück Papir, schüsch nüt, nume eis vo zäh Milione Formular idr Zähmilioneschwiz, schü-sch würklech nüt! Mit däm chaschdr grad zFüdle abputze, meh nid. Für meh aus fürz Füdle abputze isch das nid zbruche.
• U när?
• Was, u när?
• Was chunnt när?
• När chunnt nüt meh.
• Eifach nüt meh? Gar nüt meh?
• Gar nüt meh. Niemeh.
• Tröimsch?
• I tröime doch nid! Ich mache nume mis Züg, dasch aues. I zaagge nidseo dasume wi du, ibi produktiv. Xeschja das aute Tonbandgrät hie. Grundig. Das hettis no nie la hocke.
• Du heschmr widr Asichte, Koni! Di bringenis no id Chrutze! I sägedrs nume! Mir lande beid im höche Auter no idr Chischte, wirsch xeh!
• I ha scho gäng di gliche Asichte wi du gha, Toni, das weischja. Nume du wächslisch Tasichte wi Tungrhose.
• Ich wächsle nüt, Koni! I ha das nid nötig. Mini Asichte si sattufescht u tubelisichr. Das sisi scho gäng xi.
• Ahbah! Wasäch! Blödsinn!
• Schtur u grediuse u nüt vo hingrdüre u vo vorenabe u ungrufe u hingrfüre u hingerzi zrügg! Dert düre bini subr. I ha mini isige Asichte no nie gwächslet, nid so wi du. Sisi bi mir praktisch wi i Schtei gmeisslet. Da chasch druf ga, Koni! I ha Asichte wi i Schtei gmeisslet! Merkdr das!
• Das düngktmi iz no!
• Was düngkti iz no?
• Abah! I rede gar nümm mitr. Es het ke Sinn.
• Iz plötzlech?
• Dini Asichte wi i Schtei gmeisslet! Das hani no gar nie ghört vo dir. Ibi immr drvo usgange, das dini Asichte wi schlappi Schpagetti drhärchöme u überau idr Gägend dasumehange u abelampe.
• Mini Asichte?
• Dini Asichte.
• Wi schlappi Schpagetti?
• Wi schlappi Schpagetti, ja.
• Abelampe?
• Abelampe, ja. Wi bim Dalì.
• Dasch ungrächt!
• Was isch ungrächt?
• Wi du mini Asichte duesch beurteile, Koni!
• Iz mau ehrlech! Du woschmi ja nume widr
• provoziere! Du wosch, dasi vordr richtig emo-
• zionau zämebriche umi im Schtoub due wäu-
• ze vor Scham udr eis zämegränne u phoupte,
• i sigi gar nideso, widu mi gäng duesch häre-
• schteue u lächerlech mache. Du dängksch wi-
• dr nume ad Tonbanduswärtig.
• Söuidi tröschte? Muesidi psychologisch widr ufschteue? Muesidr Muet mache udr vrzeue, wi guet du im Rahme vo dine bescheidene Müglechkeite daschteisch?
• Due nid blöd!
• I due nid blöd, du duesch blöd, wenn scho!
• I due nid blöd. I due nie blöd, i bine seriöse Ma mit schöne Haar u schöne Ouge umene seriöse Läbeswandu. Uni ha eidüttig gäng di viu schönere Brüue anne aus du.
• Das seisch iz eifach nume so. Drbi hanidr denn eigehändig dini Brüuene usgläse. Zwabere äne, weisch no? Bi dere junge Kolegin, wodr schöni Ouge het gmacht.
• Ja, was ächno aues!
• I hadr denn ja xeit, was zuedr passt, u was nid. Wes nämlech nach dir ggange wär, hä-tisch du dir denn zWabere äne ja richtigi Schisbrüuene usgläse, u das nume wäge dere übrparfümierte Schlampe dertäne hingr dr Ladethek.
• Dasch nid wahr! Erschtens isch das ke Schlampe xi, sondrn e nätti Kolegin, uni ha zwöitens pungkto Brüue viu dr besser Gschmack aus du. I hadr perfekt Brüuegschmack, weni das hie a dere Schteu mau i auer Bescheideheit darf säge; uf das chasch blindlings ga, u das chasch grad näh wide wosch!
• Das düechtmi no! Dr perfekt Brüuegschmack! Sowit chunnzno!
• Ude ersch Tchleidr! I hadr scho immr xeit, wasde muesch alege u was nid, Koni. Ohni mi wärsch du ja imene Chleidrlade vrlore! Du würdisch dasumelouffe widr letscht Pennr, wi dä vo Bättlähäm! Mit Chleidr usem Brockehus!
• Aba!
• Nüt aba! Es ischeso. I gibe hie sit langem dr schtilistisch Ton a, i mache hie Tmusig, wede so wosch, udu tramplisch gäng nume bling hingrnache.
• I mues grad gredi uselache! Was du hie widr aues vrzapfsch! Das cha eine elei ja gar nid gloube! Weni nid wüsst, dases grad angersume isch, auso grad umgekehrt, wäri iz furchtbar vrworgglet u vrzworgglet wäge dir!
• Wasäch no aues!
• Uni müesst grad am Pole zBäup äne ge vrzeue, was du widr fürne Seich usegla hesch.
• Ja, gang nume zum Pole ge gränne! Dä wirter gärn wittrhäuffe! Dä wirtr zeige, wos düregeit im Läbe. Genau sone huere Schtündeler bruchsch du iz i dim Autr, churz bevor du dr ändgüutig Abgang machsch!
• Dr Pole isch ke Schtündeler.
• Vrzeu ke Seich! Dr Pole isch wou e Schtündeler! Däm louft ja diräkt dr Saft abe vor lutr religiöser Ufregig! Hesch nid xeh, winr gäng Tschnure het müesse abputze mittem Naselumpe? Dr Schpöifr ischim nume so abeglüffe! Sisch nid zum Zueluege xi!
• Däm louft nüt abe. Är isch wou e Greis worde, unr isch ja nume e Greis, so wi mir übrigens o. Mir sija glich aut, usdr gliche Klass u iz aues Greise worde, obmer wei odr nid. Schliesslech simr denn au zäme hie i Tschueu ggange u si iz au drei scho haubblödi Tattrgreise worde u am Ändi vom Läbe acho, so wi dr Hene o udr Pole o. Mir si schliesslech di vier Heude, wo no übrig plibe si vodr ganze Klass.
• Dängkwou louft däm gäng öppis abe! Bi ihm isches düttlech! Hesch nid xeh? Dä vrlürt ja schtändig sinr Körprseft! Vilech bisletr sogar iz Bett! Genau wi dr Bouvard udr Pécuchet.
• Iz chunnsch widr mit dene zwene Löle hingrfüre! Du muesch gäng di aute Gschichte fü-renäh, um öppis zbewise. Bewis mau öppis ohni dr Flaubert!
• Das hani gar nid nötig. Abr di heimr gfaue. Wenigschtens das, wüu hieume gfautmer sowiso kene meh.
• Dir gfaut no mängs nid, wedr Tag läng isch.
• Dir ämu o. Muesch iz gar nideso tue! Mir hei
• dr glich Gschmack!
• I säge ja gar nüt!
• Du duesch iz grad, wi wesdi denn nid o intressiert hätti, womr zäme idr französische Literatur gschweuget hei wi imene Vrjüngixbad.
• Di französischi Literatur isch sakrosangkt, das wüssemr. Da darfme nid drübr lache u nüt drann rüttle. Dasche heiligi Zone.
• Abah. Redemr vo öppis angerem. Si hettmr denn nid schöni Ouge gmacht.
• Was iz! Natürlech hezidr übere Ladetisch ewägg schöni Ouge gmacht! I has genau xeh!
• Si isch nume früntlech xi, dasch aues. Abr das isch öppis, wo du gar nid kennsch u nie wirsch vrschtah. Du bisch nämlech dr unfrü-ntlechscht Typ zwüsche Seftige u Bärn, womesech übrhoupt cha vorschteue.
• Bini nid.
• Bisch du wou.
• Bini nid.
• Bisch...